БАЗАР-КОРГОН ЧОПО КЕНИ

БАЗАРКОРГОН ЧОПО КЕНИ Жалалабат обл.-нун Базаркоргон р-нунда, Жалалабат ш-нан 23 км түн.-батышта, Кайырма кыш-нын четин­де, деңиз деңг. 700-745 м бийиктикте. 1972-ж. Түш. Кыргыз геол. экспедициясы чалгындаган. Кен аймагын антропогендин кум-шагыл, кумай топурак, борпоң тектери түзөт. Пайдалуу кумай­луу топурак катмары аллювий-пролювий чөгүн­дүсүнөн пайда болгон лёсс сымал чоподон турат. Саргыч боз түстө. Калыңдыгы 20 м ге че­йин, уз. 1,3 км. 3-4 м тереңдикте чопо ныктал­ган. Гранулометриялык курамы: 0,001 мм — 14,80%; 0,001 - 0,01 мм - 25,43%; 0,01 - 0,25 мм - 59,10%; 0,25 - 0,5 мм - 0,14%; 0,5 мм-ден жогоркусу - 0,43%. Ийилгичтиги 2,02-5,22%. Чоподон «100» маркасындагы кирпич даяр­доого болот. Запасы А+В+С₁ категориясы б-ча 898 миң м³.