БЕШ БАРМАК

БЕШБАРМАК – кыргыздын улуттук негизги сый тамагы. Ал казак, мурдагы көчмөн өзбек­терде да болгон. Бышкан эттин табы кайткан­да тууралып, эттин тундурулган сорпосуна кес­ме салып бышырып, аны сүзүп алып, туурал­ган этке кошот. Үстүнө майлуу, коруштуу ысык чык куюлуп, текши аралаштырылат. Б. – мур­да «туураган эт», «нарын» деп аталган тамак­тын жаңыча аталышы. Болжолу өткөн кылым-

дын 20–30-жылдарынан «бешбармак» деп ата­лып кеткен. Койдун этинен даярдалган Б-тын үстүнө керте тууралган куйрук-боор салынып тартылса «алашак Б.», төөнүн этинен даяр­далып, үстүнө жилигинин чучугун («ак челек») кошсо «ак дөбө Б.», даярдалган Б-тын үстүнө чучук коюлса «селделүү Б.», сүр эттен жасалга­ны «сүр Б.» деп аталат. Учурдун технологиясы б-ча даярдалган «Нарын», «Талас», «Көл», «Чүй», «Чаткал» ж. б. түрлөрү калк арасында кеңири жайылууда.