ДЕРАТИЗАЦИЯ

ДЕРАТИЗА́ЦИЯ (лат. de – жоюу, четтетүү ж-а фр. rat – келемиш) – жугуштуу оору, ылаӊ пайда кылуучу же таратуучу, ошондой эле экономикалык жактан зыян келтирүүчү кемирүүчүлөрдү (келемиш, чычкан) жок кылуу чаралары. Ага химиялык, механикалык ж-а биологиялык ыкма м-н жок кылуу, таштандыларды жыйноо, тазалоо кирет. Дератизация турак үйлөрдө, кампа, тегир­мен, мал сарай, кеме, самолёт, жашылча сак­тагыч, күнөскана ж. б-да жүргүзүлөт. Алдын алуучу ж-а жок кылуучу Дератизация болуп бөлүнөт. Алдын алуучу Дератизацияда кампанын пайдубалы бе­тон, таш же кыштан бийик салынат; келемиш­тин азыгы м-н ийини жок кылынат; терезе, эшик­тери бүтөлөт. Жок кылуучу Дератизацияда келемиштерге каршы механикалык, химиялык ж-а бактериологиялык ыкмалар кол­донулат. Механикалык ыкмада капкан ж-а кармагычтар, ал эми, химиялык ыкмада ууланган заттар колдону­лат, келемиштердин ийинине уу (кан антикоа­гулянттары, ратиндан, зоокумарин ж. б.) чачы­лат. Бактериологиялык ыкмада келемиштерге каршы бактериялуу заттар коюлат. Аны эпидемиологиялык станциялар, ветеринариялык адистер жүргүзөт.