ЖАСАЛМА ТИШ

ЖАСАЛМА ТИШ , т и ш п р о т е з и – түрдүү себептерден түшкөн же жулдуруп салынган тиш­тин ордун толуктоо же кыйшык тиштерди түзөтүү үчүн жасалган атайын түзүлүш. Балдар­дын тиши туура эмес жайгашканда, же кемээк, орсок тиш болгондо атайын ортопедиялык Ж. т. колдонулат. Ал бет м-н жаактын бузулушун алдын алууга ж-а дарылоого мүмкүндүк берет. Ж. т. организмге зыянсыз материалдан (фар­фор, пластмасса, асыл металлдар ж. б.) ар бир кишиге жеке жасалат. Ж. т-ти өз убагында сал­дырбаса, тамак-аш жакшы чайналбай жутулуп, акыры ичеги-карындын иши бузулат. Ж. т. түзүлүшү б-ча таяныч тишке бекитилген турук­дат баспас болоттон, пластмассадан, фарфордон ж-а металлды пластмасса же фарфор м-н кап­тап жасалат. Эгер маңдайкы тиштин таажысы такыр бузулуп, түбүн дарылоого мүмкүн болсо, ага бурап орнотулган штифтүү Ж. т. койсо бо­лот. Көпүрө сымал Ж. т. 1–4 тиш жок учурда жасалат. Анын ортосун фарфор же пластмасса­дан, же бүт эле металлдан жасап, таяныч тиш­ке бекитет. Таяныч тиш бекем болуп, жакшы дарыланышы зарыл. Кийме Ж. т. таңдайга же бүйлөгө кийилүүчү пластинкадан ж-а ага беки­ген Ж. т-тен турат. Тиштин көбү жок болгондо ж-а таяныч болор соо тиш жок учурда кийме тиш салынат. Ж. т. салуудан мурда чириген тишти дарылоо, өтө бузулган тишти жулдуруу, таяныч боло турган тиштердин түбүндөгү этти жакшылап текшерүү зарыл.