ЖОЛДОШ СУРАМАЙ

ЖОЛДОШ СУРАМАЙ – жаштар оюну. Улан­дар, кыздар эки-экиден болуп, тегерек тартып отурушат. Адегенде оюн башчы шайланат. Оюн башчы отургандар м-н оюн шартын (оюн айы­бы 5–10 шап, 3 куплет ыр, жаңылмач, 3–4 укуй) макулдашып алат да, жигит-кыздарга: «Кимге жолдош керек?» деген суроону берет. Туш-туш­тан «Мага! Мага!» деген үндөр чыгып, колдорун көтөрөт. Оюн башчы алардын бирөөнү көрсөтө «Сага ким керек?» дейт. Ал керектүү кыздын же жигиттин атын атайт. Оюн башчы аты атал­ган кыздын же жигиттин жубу жанындагы жол­дошун берүүгө макул болсо, оюн шартын айтат. Жолдош сураган кыз же жигит шартты аткар­са, суралган киши ордунан туруп, сурап алган кишинин жанына отурат. Суралган жигиттин же кыздын жанындагысы бербейм десе, жол­дош сураганы ага шартын коёт. Эгер талап кы­лынган шарт так аткарылса, анда жанындагы жолдошун эч кимге бербей, алып калат. Бул оюн жаштардын чыг-лыгынын өнүгүшүнө, ур­маттаган же сүйгөн курбусу м-н сырдашуусуна шарт түзгөн. Учурда Ж. с. өтө сейрек ойнолот. И. Молдобаев.