ЖУУКУ

ЖУУКУ – Жети-Өгүз р-нундагы чоң суулардын бири. Тескей Ала-Тоодон башталып, Ысык- Көлгө куят. Уз. 63 км, алабынын аянты 590 км². Карагай, арчалуу кууш капчыгай аркылуу агып, Жууку капчыгайынан Ысык-Көл ойдуңуна чыга бергенде агымы жайлап, тик капталдуу кууш коктуга өтөт. 60тан ашык куймасынын ириле­ри: Ашуу-Кашка-Суу, Жуукучак. Алабында жалпы аянты 1,36 км² келген 11 тоо көлү бар, алардын эң ириси – Жууку көлү. Апрелде кире баштап, сентябрда тартылат. Жылдык орт. чы­гымы 6,28 м³/сек; эң көбү 52,2 м³/сек. Сугатка пайдаланылат. Боюнда Саруу, Даркан кыш. жайгашкан. Аты байыркы кыргыз тилинде жуука, аң, аңгек маанисинде, о. эле кууш, тар капчыгайды да туюндурат.