БРОДСКИЙ Исаак Израилевич

БРО́ДСКИЙ Исаак Израилевич [25. 12. 1883 (6. 1. 1884), Таврия губерниясы, Софиевка кыштагы – 14. 8. 1939, Ленинград] – орус живописчиси жана графиги, РСФСРдин искусствого эмгек сиӊирген ишмери (1932). Алгач Одесса көркөм сүрөт окуу жайында, 1902–1908-жылдары Петербургдагы Көркөм сүрөт академиясында И. Е. Репинден окуган. 1905–1907-жылдары бир нече саясий карикатураларды тарткан. Бродскийдин тарыхый-революциялык мүнөздөгү чыгармалары («Коминтерндин II конгрессинин салтанаттуу ачылышы», 1920–1924; «Бакулук 26 комиссардын атылышы», 1925) бар. Анын «В. И. Ленин Кремлдин фонунда» (1924), «В. И. Ленин Смольныйда» (1930) портреттери, пейзаждары белгилүү. Ленин ордени менен сыйланган.

И. И. Бродский. «В. И. Ленин Смольныйдын фонунда».
1925. И. И. Бродскийдин үй-музейи (С.-Петербург).