ГИДРАВЛИКАЛЫК КЫЙМЫЛДАТКЫЧ

ГИДРАВЛИКАЛЫК КЫЙМЫЛДАТКЫЧ – суюктук агымынын энергиясын жетеленүүчү звенонун (вал, шток) мех. энергиясына айландыруучу машина. Иштөө аракетине жараша – суюктук агымынын импульстук моментинин өзгөрүшүнүн натыйжасында жетеленүүчү звеносу (гидротурбина, суу дөӊгөлөгү) кыймылга келүүчү ж-а жумушчу органы (поршень, пластина) камерага толтурулган суу басымы м-н жылуучу көлөмдүк Г. к. болуп айырмаланат. Биринчисинде жетеленүүчү звено жалаӊ гана айланма кыймылда болсо, көлөмдүк Г. к-та чектелген абалда алга-артка, артка айланма (гидроцилиндр) же болбосо чексиз айланма (гидромотор) кыймыл жасайт. Гидроцилиндр күч берүүчү ж-а моменттик деп бөлүнөт. К ү ч б е р ү ү ч ү гидроцилиндрде поршенге бириктирилген шток, цилиндр ичинде алга-артка түз сызыктуу кыймылдайт. Моменттик гидроцилиндрде анын ичиндеги вал корпуска салыштырмалуу 360°ка жетпеген артка бурулуу кыймылын жасайт. Гидромотор поршендүү ж-а ротордуу болуп, поршень м-н ротордун иштешинен жумуш аткарылат. Көлөмдүк Г. к-та суу басымы 35 Мн/м²га (350 кгк/см2) жетет, гидромоторлор 3000 кВтка чейинки кубаттуулукта жасалат.