ВЕРЕЩАГИН

ВЕРЕЩА́ГИН Василий Васильевич [14(26).10.1842, Новгород губ., Череповец ш. – 31.3 (13.4). 1904] – орус баталист живописчиси. Алгач Петербург көркөм сүрөт академиясында (1860–63), кийин Парижде (1864–65) окуган. Бир нече жолу Кавказга, Крымга, эки жолу Түркстанга (1867–68, 1869–70), эки ирет Индияга (1874–76, 1882) барган. 1877–78-ж. орус-түрк согушуна катышкан. 1884-ж. Сирия м-н Палестинаны, 1880–1903-ж. Америка, Японияны ж-а Россиянын чет-жакаларын кыдырып чыккан. 1904-ж. Орус-япон согушуна катышкан. В. өзү күбө болгон согуш элестерин чагылдырган «Согуш апофеозу» (1871–72), «Чабуулдан кийин» (1881)

В. Верещагин. «Куш кармаган кыргыз
байы». 1871. Мамл. Третьяков гал.

ж. б. атактуу чыгармаларын жараткан. В-дин картиналары документтик тактыгы, автордук ойдун ачык берилиши ж-а түстөрдүн карым-катнаштарынын ыргактуулугу м-н айырмаланат. В. турмуш чындыгын ырааттуу көргөзүүгө умтулган демократ сүрөтчү болгон. В-дин чыг-лыгында «Түркстан сериясы» (1871–74) өзгөчө орун ээлейт. Аталган серияга кыргыз жери ж-дөгү көптөгөн тематикалык чыгармалары [«Чүй суусу боюндагы кыргыз боз үйү», «Кыргыз көчү» (1869–70), «Куш кармаган кыргыз байы» (1871) ж. б.] ж-а этюддары («Барскоон өткөөлү», «Ала-Тоо аймагында», «Ысык-Көл» ж. б.) кирет. В. кыргыз элинин турмушун, жаратылышынын кооздугун суктануу ж-а тереӊ сый-урмат м-н тарткан.
Ад.: Лебедев А. К. В. В. Верещагин. М., 1972.