БОЛОНЬЯ КЕЛИШИМИ

БОЛО́НЬЯ КЕЛИШИМИ – 1999-жылдын 19-июнунда Европанын 29 өлкөсүнүн билим берүү министрликтеринин ортосунда кол коюлган келишим. Болонья ш-нда түзүлгөндүктөн, Б. к. деп аталып калган. Ал жогорку билим берүү тармагында европ. кызматташтыкты өнүктүрүү ж-дөгү 1998-ж. Сорбонна келишиминин негизинде түзүлгөн. Б. к. 10 жылдын ичинде бирдиктүү европ. билим берүү системасын түзүү максатын көздөйт. Киргизилип жаткан бирдиктүү жогорку билим берүү системасы эки циклден турат: толук эмес жогорку билим – «бакалавр» титулу, ал кеминде 3 жылга созулуп, билим алууну улантууга, эмгек рыногуна жарамдуу квалификация болуп эсептелет. Толук жогорку билим – «магистр» же «доктор» титулдары берилет.