БАРУЗДИН

БАРУ́ЗДИН Юрий Дмитриевич (1926, Ленинград облусу, Красный Холм кыштагы – 1963, Фрунзе) – археолог; Ош облусунун байыркы тарыхын изилдөө боюнча археологиялык экспедициялардын уюштуруучусу жана жетекчиси (1952–62). 1952-жылы Ленинград мамлекеттик университетинин тарых факультетин бүтүргөн. 1952–56-жылдары Ош край таануу музейинин илимий кызматкери, 1957-жылдан Кыргыз ССР ИАнын Тарых институтунун илимий кызматкери болуп иштеген. Алай жана Баткен аймагындагы археологиялык эстеликтерди изилдеген. Б. з. 1–5-кылымдарына таандык Кара-Булак (Баткен району) ж. б. көрүстөндөрдөн өтө сейрек кездешүүчү мумияланган сөөк коюлган бейиттер, кооздук буюмдар, курал-жарактар, жүндөн, жибектен токулган кездемелер табылган, ошондой эле Баткен аймагынын Ак-Дөбө кыштагынын жанынан жана Алай өрөөнүндөгү Кара-Бейиттен байыркы рун жазма эстеликтерин ачкан. «Кара-Булак бейити» (1954), «Кара-Булак бейитинен табылган колодон жасалган аялдын статуэткасы» (1961) ж. б. эмгектеринде археологиялык негиздүү маселелерди чагылдырган.
Д. Ф. Винник.