ВЕЛЬЯМИНОВ-ЗЕРНОВ

ВЕЛЬЯМИ́НОВ-ЗЕРНО́В Владимир Владимирович [31.10(12.11).1830, Санкт-Петербург – 17(30). 1. 1904, Киев] – орус окумуштуусу, чыгыш таануучу, этнограф, археолог, лингвист. Россия Илимдер академиясынын академиги (1861). Санкт-Петербург Илимдер академиясынын ардактуу мүчөсү (1890). 1857-жылдан Орус археологиялык коомунун анык мүчөсү, 1858–1867-жылдарга чейин Орус археологиялык коомунун Чыгыш бөлүмүнүн секретары. 1858-жылдан Россия Илимдер академиясынын Азия элдеринин адабияты жана тарыхы боюнча экстраординардык академиги. 1886-жылы Санкт-Петербург университетинин совети ага түрк-татар тилдери боюнча илимдин доктору даражасын ыйгарат. Анын эмгектеринин ичинде «Касым хандары жана ханзаадалары жөнүндө изилдөө», «Чагатай-түрк сөздүгү», «Крым хандыгынын тарыхы үчүн Ички иштер министрлигинин Москвалык башкы архивинен алынган материалдар» жана башка фундаменталдуу эмгектери бар.