ВИЗА
ВИ́ЗА (лат. visus – көрүлгөн, каралган) – 1) жооптуу кызмат адамы тарабынан кандайдыр бир документтин же актынын анын аныктыгын же күчүнө киргизилишин күбөлөндүргөн жазуу. 2) Кайсы бир мамлекетке кирүүгө, андан чыгып кетүүгө же анын аймагы аркылуу өтүүгө атайын уруксат берилгендиги жөнүндө паспортко коюлган расмий белги. Дипломатиялык өкүлчүлүктөрдүн мүчөлөрүнө, эл аралык жолугушуулардын, көргөзмөлөрдүн, салабаттуу жыйындардын, конфялардын катышуучуларына ж. б. четке чыккан расмий кызмат адамдарына атайын дипломатиялык Виза берилет, ага ылайык, эл аралык эреже боюнча кабыл алуучу мамлекеттин чегарачылары, башка бийлик кызматкерлери мындай адамдарга урмат сый көрсөтүп, тейлөөгө көңүл бурушат. Виза мерчемдүү мөөнөткө берилет. Виза системасы – өлкөгө чет өлкөлүк жарандардын келип-кетишин ж-а өз жарандарынын чет өлкөлөргө барышын көзөмөлдөп, жөнгө салып туруучу мамлекет аралык кызмат чөйрөсү. Тиешелүү мамлекеттердин өзара келишимдеринин негизинде Визасыз карым катнашуу практикасы да кеңири жайылтылган.
М. Керимбаев.