ВИНОГРАДОВ Иван Матвеевич
ВИНОГРА́ДОВ Иван Матвеевич [2 (14).9.1891, Россия, Псков облусу, азыркы Великие Луки району, Милолюб кыштагы – 20.03.1983, Москва] – математик, СССР ИАнын академиги (1929), эки жолку
Социалисттик Эмгектин Баатыры (1945, 1971), Петербург университетин бүткөн (1914). 1918–20-жылдарда Пермь университетинде, 1920–34-жылдарда Ленинград политехникалык институтунда ж-а Ленинград университетинде доцент, профессор, 1932-жылдан СССР ИАнын математика институтунун директору, «Математика энциклопедиясынын» (1–5-т., М., 1977–85) башкы редактору, «Известия АН СССР. Серия математическая» журналынын башкы редактору (1948). Виноградов 20-кылымда математикада чечүүгө мүмкүн эмес деп эсептелген проблемаларды чечкен, тригонометриялык суммалар ыкмасын түзгөн. Лондон король коомунун (1942), көптөгөн башка илимий мекемелердин ж-а дүйнөлүк коомдордун ардактуу мүчөсү болгон. М. В. Ломоносов атындагы алтын медаль алган (1971). Илимий эмгектери негизинен анализдик сандар теориясына арналган. Лениндик (1972) ж-а СССР мамлекеттик (1941, 1983) сыйлыктарынын лауреаты. 6 Ленин, Октябрь Революциясы ордендеринин ээси. Россия ИАда И. М. Виноградов атындагы сыйлык белгиленген (1993).
Эмг.: Избр. труды. М., 1952; Метод тригонометрических сумм в теории чисел. М., 1980; Основы теории чисел. М., 1981.