ВИСКОЗА БУЛАСЫ
ВИСКО́ЗА БУЛАСЫ – табигый целлюлозаны химиялык жол м-н иштетүүдөн алынган жасалма була. Аны даярдоо төмөнкү этаптардан турат: вискоза эритмесин даярдоо, формага келтирүү ж-а кургатуу. Ал колдонулушуна жараша текстиль жиби, корд, штапель булалары түрүндө чыгарылат. Көпчүлүк органикалык эриткичтердин таасирине туруктуу. Аны алуу арзан ж-а андан даярдалган кездемелер түрдүү түскө жакшы боёлот, жакшы гигиеналык сапатка ээ. Бирок суу кезинде тез бырышат, сүрүлүүгө чыдамсыз келет. Ошондуктан, аны модификациялоо м-н бышыктыгы жогорулатылат. Жибек, штапель ж-а кебез же жүн кездемелерге кошулат; тор ж-а абдан бышык техникалык буюмдарды жасоодо колдонулат.