БЕЛОКТУУ ТОЮТ
БЕЛОКТУУ ТОЮТ , п р о т е и н д ү ү т о ю т – өсүмдүк ж-а жаныбардан алынган белоктуу (протеиндүү) мал азыгы. Протеин дан, акшак, улпак, шрот ж-а күнжарада көп болот. Көк тоюттагы – беде, эспарцет, соя, буурчак, жер буурчак ж-а кашкабеде ж. б-дагы протеин жогорку сапаттуу, сиңимдүү келет. Тоюттун белоктуулугу чөптүн чабылган убактысына, даярдоо технол-сына, түрүнө ж-а сортуна байланыштуу болот. Гүл ачар алдында чабылган беденин 1 тоют бирдигинде 228 г, эспарцетте 186 г, ал эми буурчак данында 171 г, жер буурчакта 186 г, машбуурчакта 211 г, сояда 223 г сиңимдүү протеин бар. Ачыткыда белок көп, ал – В тобундагы витаминдердин ж-а микроэлементтердин булагы. Жаныбардан алынган тоют өсүмдүк тоютуна караганда белоктуулугу ж-а биол. баалуулугу м-н айырмаланып, алмаштырылгыс амин к-талардын бардыгы болот. Мис., сөөк уну, сөөккан уну, балык уну протеинге, витаминдерге, минерал заттарга бай.