БЕНЕШ
БЕ́НЕШ Эдуард (28.5.1884, Кожлани, Чехия – 3.9.1948, Сезимово-Усти, Чехия) – Чехословакиянын мамлекеттик ишмери. 1915–18-жылдарда Парижде түзүлгөн Чехословакиялык улуттук советтин генералдык секретары. Бенеш Чыгыш Европадагы күчтөрдүн тең салмактуулугун сактоо максатында Кичи Антантаны (1921) түзүүчүлөрдүн бири. Ал Улуттар Лигасынын ишмердүүлүгүн чечкиндүү түрдө колдогон, Улуттар Лигасынын Коопсуздук Советинин (1923–27) ж-а комитетинин (1927–38) мүчөсү. 1918–35-жылдарда Чехословакиянын тышкы иштер министри, 1935–38-жылдарда президенти. Мюнхен макулдашуусунан кийин отставкага кеткен. Экинчи дүйнөлүк согуш учурунда Чехословакиянын эмиграциядагы өкмөтүн жетектеген (1940-жылдан). 1945-жылы мекенине кайтып келген ж-а 1946–48-жылдарда Чехословакиянын президенти болуп шайланган. 1948-жылы февралда коммунисттердин бийликти басып алуусунан кийин отставкага кеткен.