БЕРМЕТ
БЕРМЕТ – сууда жашаган кээ бир үлүлдөрдүн катуу кабыгы менен ички жука кабыгынын аралыгында пайда болуучу, күмүштөй жалтырап, кубулуп туруучу саргыч түстөгү катуу, тоголок же формасыз өсүндү. Ошол эки кабыктын арасына майда кумга окшогон катуу заттар кирип, денесин өйкөп дүүлүктүргөндө, катуу жана ички кабыгы бөлүп чыгарган көмүр кычкыл кальций менен аралашып, Бермет пайда болот. Алар өтө кооз келип, шакек, сөйкө, билерик, чачпак, чолпу сыяктуу буюмдарды кооздоо үчүн пайдаланылат. Бермет таруудайдан көгүчкөндүн жумурткасындай көлөмдө болот. Ал көлөмүнө, салмагына карата бааланат. Деңиз Бермети Перс булуңу, Кызыл деңиз, Япония, Шри-Ланка, Австралия жээктеринен; тузсуз сууда кездешет. Бермет Россия (Карелия, Мурманск, Архангельск, Ыраакы Чыгыштан), Шотландия, Германия, Кытай, Түндүк Америка өлкөлөрүндө алынат. Бермет колго өстүрүү жолу менен да (Япония) алынууда.
