БИЛЕРИК
БИЛЕРИК – кыз-келиндер билегине салына турган асем буюм. Алтын, күмүш, жезден, ошондой эле мүйүздөн да жасалган. Зергерлер Билерикке асыл таштардан көзчө салып, «кыял», «мүйүз» өңдүү оюм-чийимдин татынакай нускаларын түшүрөт.
Билериктин жалпак жана жумуру түрлөрү болот. Мүйүз Билерик да өзүнчө көркөмдөлөт. Мүйүздүн көңдөй жеринен арааланып алынат да, Билерик турпатына келтирилет. Мүйүз Билерикке да акак таш жана башкалар чөгөрүлүп, оюм-чийим менен кооздолот. Учурда желим, үлүл кабыктарынан, иштелген тери жана башка көркөмдөлүп жасалган Билериктин ар кандай түрлөрү кездешет.
