ДОКУЧАЕВ
ДОКУЧА́ЕВ Василий Васильевич [17. 2(1. 3.). 1846, азыркы РФ, Смоленский облусу, Сычев району, Милюков кыштагы – 26.10 (8.11). 1903, Петербург] – орус табият таануучу, азыркы топурак таануу илимин ж-а зоналык агрономияны негиздөөчү. 1871-жылы Петербург университетинин физика-математика факультетинин табият таануу илимдер бөлүмүн бүткөн. 1872-жылдан Петербург табият таануу коомунун, 1873-жылдан минералогия коомунун анык мүчөсү. 1871–86-жылдары Волга, Днепр, Батыш Двина дарыяларынын жогорку алаптарындагы өрөөндөрдүн түзүлүшүн ж-а борпоң тоо тектерди изилдеген. Докучаевдин жетекчилиги м-н Нижний Новгород губерниясынын аймагы изилденип, анын топурак ж-а геологиялык картасы түзүлгөн. Докучаев топуракты бонитировкалоонун табигый-тарыхый ыкмасын сунуш кылган. Анын идеялары токой таануу, мелиорация, гидрогеология ж. б. илимдердин өнүгүшүнө таасирин тийгизген. 1946-жылы В. В. Докучаев атындагы сыйлык ж-а алтын медаль белгиленген.
Эмг.: Соч., т. 1–9. М., 1949–61.
Ад.: Чеботарева Л. А. Василий Васильевич Докучаев //Докучаев В. В. Соч. Т. 9. М., 1961.