ДЮССЕЛЬДОРФ
ДЮССЕЛЬДО́РФ – Германиядагы шаар (1288- жылдан). Түндүк Рейн-Вестфалия жеринин (административдик- аймактык бирдик) административдик борбору. Калкы 629 миң (2023). Рейн дарыясына Дюссель дарыясы куйган жерде жайгашкан порт. Эл аралык аэропорту бар. Рур көмүр бассейнинин экономикалык-финансы борбору. Кара металлургия, оор машина куруу, химия, айнек, кагаз, тигүү, полиграфия, тамак-аш өнөр жай ишканалары иштейт. Университет, сүрөт академиясы ж-а сүрөт, Кунстхалле, Түндүк Рейн-Вестфалия жери ж. б. музейлер бар. Алгач 12-кылымдан эскерилет. Готика стилиндеги сепил-сарай (13-кылым), Санкт-Ламбертускирхе чиркөөсү (13–14-кылымдар), ренессанс стилиндеги ратуша (16-кылым), барокко стилинде салынган көптөгөн чиркөө (17–18-кылымдар) сакталган. Дюссельдорфто акын Г. Гейне туулган.