ДИПЛОМАТИЯ
ДИПЛОМА́ТИЯ – мамлекеттердин тышкы саясатын жүзөгө ашыруу боюнча расмий ишмердиги. Ошондой эле чет өлкөлөрдө мамлекеттин кызыкчылыктарын коргоо боюнча мамлекет башчыларынын, өкмөттөрдүн жана атайын тышкы карым-катнаш органдарынын расмий иш-аракеттери. «Дипломатия» термини Байыркы Грекияда чет өлкөлөргө жиберилүүчү атайын адамдардын өкүлдүгүн көрсөтө турган ишеним грамотасы – «диплома» деген бүктөлмө тактайдын атынан чыккан. Дипломатиялык иштерди атайын элчиликтер, миссиялар же ишенимдүү убактылуу өкүл жүргүзөт. Дипломатиянын негизги максаты – эл аралык аренада мамлекеттин түпкү таламдарын коргоо.