ДҮКӨН

ДҮКӨН (арабча дукан – устакана) – 1) усталардын узануучу жайы. Темир устанын Дүкөнүндө көөрүк, очок, дөшү, балка, барскан, кыпчуур, кескич, көзөөч, тешкич жана башкалар болуп, алар менен така, тул­га, кычкач, ооздук, тогоо, үшкү, шибеге, купа, кыма, бычак, балта, керки, ийди, аталгы жана башка буюмдар жасалган. Жыгач усталардын Дүкөнүндө араа, балта, аштама, керки, тез-ийди, аталгы, түрпү, кырма сүргү болгон. Бул куралдар менен боз үйдүн жыгачтары, ээр, ыңырчак, алабакан, такта, бешик жана башкалар жасалган. 2) Чекене соода ишканасы. 3) Килем жана түрдүү таарларды то­кууга даярдаган курулма жай.

И. Молдобаев.