ДҮЙШӨБАЕВ Талант
ДҮЙШӨБАЕВ Талант Ибраимович (2. 6. 1968- жылы туулган, Фрунзе) – дүйнөгө таанымал спортчу, эмгек сиңирген спорт чебери. Борбордук Азия тарыхында кол топ (гандбол) боюнча Олимпия оюндарынын 1-чемпиону. Кол топ м-н 1980-жылдан А. Л. Гагулинден машыга баштап, Бишкек шаарындагы
өспүрүмдөрдүн атайын спорт мектебинде тарбияланган. ФПИде окуп жүргөндө СССР курама командасына кирген, 1989–92-жылдарда Москванын ЦСКА командасында ойноп, КМШ өлкөлөрүнүн кол топ боюнча курама командасынын капитаны болгон. Россиянын, Испаниянын ж-а Германиянын клубдарында ойногон. СССРдин, Европанын (Чемпиондор лигасы, 1994), Дүйнөнүн (Швеция, 1993), Олимпия оюндарынын (Барселона, 1992) чемпиону. 1993-жылдан Испанияда жашайт. Испания спорт институтун бүтүрүп, кол топ боюнча ошол өлкөнүн курама командасынын капитаны. Атланта Олимпиадасында (1996) Испаниянын курама командасын кол топ боюнча тарыхта биринчи жолу 3-орунга жеткирген. 1990-жылы Сиэтл шаарында (АКШ) болуп өткөн «Игры доброй воли», 1991-жылы Барселонадагы Олимпия алдындагы оюндардын жеңүүчүсү; Испания суперкубогунун (1992–94) ээси; 1992–94-жылдарда Испания чемпиону; 1995–97-жылдарда Испания кубогунун, клубдар арасындагы дүйнө кубогунун жеңүүчүсү; 1996-жылы Европа биринчилигинин (Испания) күмүш, Олимпия оюндарынын коло, 1998-жылы Европа чемпионатынын (Италия) күмүш медалынын ээси. 1994– 96-жылдары «Handbal World Magazine» журналынын иликтөөсү боюнча дүйнөнүн, Исландия (1995) ж-а Японияда (1997) болуп өткөн дүйнө чемпионатында, Европа биринчилигинде (Испания; 1996) мыкты оюнчу катары таанылган. Медалдар м-н сыйланган.
К. Исмаилов.