ЕГЕМБЕРДИЕВ

ЕГЕМБЕРДИЕВ Жумакадыр (3. 5. 1929-жылы туулган, Нарын облусу, Кочкор району, Дөӊ-Алыш айылы) – журналист, кыргыз телерадио берүүлөрүнүн баш­тоочторунун бири, радио драматург, жазуучу, Кыргыз ССРинин маданиятына эмгек сиӊирген ишмер (1974), СССР телерадиосунун отличниги (1981). Фрунзедеги педагогикалык институтту бүтүргөн (1952). Эмгек жолун СССР Илимдер академиясынын Кыргыз филиалынын тил жана адабият институтунда иштөөдөн баштаган (1952–1954). Егембердиев элдик оозеки чыгармачылыктын бай үлгүлөрүн жыйнаган. 1954–1996-жылдары Кыргыз ССРи­нин мамлекеттик телерадио корпорациясында редактор, башкы редактор болгон. «Кутмандуу болсун күнүӊөр», «Ыр канатында», «Бетке айткандын заары жок», «Шибеге», «Биздин радиокитепкана», «Театр микрофондо» циклдик берүүлөрдү негиздеген (1955–1956). Муса, Атай, Карамолдо, Аб­дылас жана башкалардын концерттик программаларын, С. Каралаевдин варианты боюнча «Манас» эпосу­нан 20 сааттык үзүндүнү, А. Токомбаев, Т. Сы­дыкбеков жана башка жазуучулардын эскерүү маектерин, ошондой эле 40ка жакын радио коюуларды жаз­дырып, алтын казынага калтырды. Егембердиев – кыр­гыз радио драматургия жанрын негиздөөчү­лөрдүн бири. Кыргыз радиосунун тарыхы жөнүндөгү «Ободогу жаӊырык» аттуу китеби жарык көргөн (1991). «Эмгек учкуну» (1977), «Мезгил чыйы­ры» (1979) очерк-публицистикалык жыйнактардын, «Тагдыр кайрыктары» (2001), даректүү «Акактыктын шейити» (2008) повесттеринин, «Канат кан» та­рыхый романынын (2006) автору. И. Стаднюк («Согуш» романын, 4 том), Степан Сарыг Оол («Сары уул баяны», 2 китеп), К. Симонян, Н. Мак­рушенко, А. Алексиндин чыгармаларын кыр­гыз тилине которгон. Даӊк медалы менен сыйлан­ган (2001).