ЖАНАЯК
ЖАНАЯК – 1) жол жүргөндө, жоого аттанганда, мал оторлотуп же көчүп жүргөндө колдонулуучу жыгач идиш. Ж-ты арча, кайың, тал, теректен буюмдун көлөмүнө жараша кыйып келип, аарчып, ичин оюп, көлөкө жайда кургатып (бир кайнатып алса, сары суусу чыгып, урунганга бышык болгон), ийди, бычакты колдонуу м-н ар кандай көлөмдө сап чыгарып жасашкан. Анын айрымдарынын сабы оймо-чиймеленип, коло, жез, күмүш чөгөрүлүп асемделген; 2) насыбай ийлей турган идиш. Чөйчөк сыяктуу тегерек же сүйрү формада, түбү, жан
жактары калың, ичи чуңкур, саптуу жасалат. Бир жагы жалпак, экинчи жагы быдырлуу, жумуру келген таякчасы (ийлегичи) болот. Ж-тын сабы м-н таякчасынын учун ысытылган шиш м-н тешип, кайыш өткөрүп, боо башын чачылап, илип коюшкан. Учурда Ж-ты музейлерден гана көрүүгө болот.