ЖАРАНДЫК КОРГОНУУ ШТАБЫ
ЖАРАНДЫК КОРГОНУУ ШТАБЫ – жапырт кыргын салуучу куралдардан сактануу ж-а алардын кесепеттерин жоюу багытында жарандык коргонуу күчтөрүнө ж-а калкка жетекчилик кылган башкаруу органы. Жарандык коргонууга жетекчилик кылып, керектүү чараларды ишке ашыруу үчүн жарандык коргонуунун республикалык, крайлык, облустук, шаар-райондук штабдары түзүлөт. Жарандык коргонуу штабы негизинен жарандык коргонуунун пландарын иштеп чыгат; душмандын кол салуу коркунучу жөнүндө калкты, мекемелерди, уюмдарды алдын ала кабарлоо түйүндөрүн, элдин жапырт кырылуудан сактанышын уюштурат ж-а камсыз кылат; эл чарбасынын тиешелүү объектилерин кол салуу кырдаалында үзгүлтүксүз иштөөгө даярдайт. Бул милдеттерди так орундатуу үчүн жарандык коргонуу штабы кол салуу коркунучу туулганда же согуш убагында жарандык коргонуу боюнча кандай аракеттерди жүргүзүү керек экенин күн мурунтан пландайт. Кыргызстанда жарандык коргонуу штабынын милдеттерин өзгөчө кырдаалдар министрлигинин жарандык коргонуу боюнча башкы башкармалыгы аткарат, к. Жарандык коргонуу.