ЖАСАЛМА КӨЗ
ЖАСАЛМА КӨЗ – пластмасса же айнектен жасалган көз. Ал түрдүү себептерден көзү соолуп калган кишилердин көз чарасына косметикалык, ошондой. эле дарылоо, оорунун диагнозун табуу ж-а көздү ар кандай зыяндуу нерселерден сактоо максатында салынат. Жасалма көз өзгөчө тунук, түстүү айнектен ж-а пластмассадан жасалып, формасы, өлчөмү соо көзгө туура келгидей болуш керек. Косметикалык жасалма көз айыкпаган ар түрдүү оорудан кийин көздү алып салган учурда салынат. Дарылоо үчүн жасалган жасалма көз пластмассадан, кээде дары кошулуп жасалат. Ал көздүн түрдүү катмарына жасалган пластикалык операциядан кийин ж-а көздү дарылоо үчүн коюлат. Диагноздук жасалма көз көзгө түшкөн жат нерсенин рентген аркылуу көздүн кайсы жеринде турганын билүү үчүн да колдонулат. Ал эми көздү сактоочу жасалма көз коргошун кошулган айнектен жасалып, көздүн ткандарын түрдүү нурлар м-н дарылоодо көздүн тканын сактайт. Аны түнкүсүн алып, бор кислотасынын эритмеси м-н чайкап, кургак кармоо зарыл.