КОСМОСТУК ЧЕЛНОК
КОСМОСТУК ЧЕЛНО́К – Жер орбитасына адамдарды ж-а жүктөрдү ташуу үчүн колдонулуучу космос кемеси. АКШнын «Спейс шаттл» космостук челногу 1981-жылы учурула баштаган, ал эми советтик «Буран» космостук челногу орбитага «Энергия» деп аталган ракета алып жүрүүчүнүн жардамы м-н 1988-жылы автоматтык түрдө өзүнүн жалгыз учуусун аткарган. Ошондой эле Европалык космос агентчилигинин «Гермес» космостук челногу иштелип чыккан. «Спейс шаттл» космостук челногунун транспорттук системасы негизинен үч ракеталык кыймылдаткычтан, эки катуу отундуу ракеталык ылдамдаткычтан турат ж-а алар учкандан эки мүнөт өткөндөн кийин ажырап жерге түшөт. Космостук челнок 30 тга чейинки жүктү алып жүрө алат. Кайра атмосферага киргенде планер сыяктуу учуп, конуу жолуна конот. 1986-жылы январдан 1988-жылы сентябрга чейин АКШ «Челленджер» космостук челногунун жарылуусунан кийин «Спейс шаттл» програмасын иштетүүнү токтоткон. 1989-жылы учуулар калыбына келтирилген.