КОСОВО ТАЛААСЫНДАГЫ САЛГЫЛАШУУ
КОСОВО ТАЛААСЫНДАГЫ САЛГЫЛАШУУ (1389) – сербиялык-босниялык аскерлер м-н түрк султаны Мурад Iнин ортосундагы согуш. 1389-жылы 15-июнда азыркы Приштин шаарына жакын жерде, Косово талаасында князь Лазарь башында турган 15–20 миң сербиялык-босниялык аскерлер түрк султаны Мурад Iнин армиясынан (27–30 миң) жеңилген. Лазарь туткунга түшүп, өлтүрүлгөн ж-а 50 миңдей серб аскери мууздалган. Согуштун жүрүшүндө Мурад I өзү да өлүп, (жаш серб Милош Обилич канжар м-н сайган), анын ордун баскан Баязид I (Мурад Iнин уулу) туткундарды өлтүрүүгө буюрган. Бул салгылашуудан кийин түрктөргө Дунай, Сава ж-а Тимока дарыяларынын алабындагы аймактар өткөн ж-а Сербия Осмон империясына көз каранды болуп, 1459-жылы анын курамына толук киргизилген.