ВЕРСАЛЬ ТЫНЧТЫК КЕЛИШИМИ (1783)

ВЕРСА́ЛЬ ТЫНЧТЫК КЕЛИШИМИ (1783) АКШ ж-а анын союздаштары (Франция, Испания, Нидерланд) м-н Улуу Британиянын ортосунда 1783-ж. 3-сентябрда Версаль ш-нда түзүлгөн. 1775–83-ж. Түн. Америкадагы көз каранды эместик үчүн согуш АКШнын жеӊиши м-н аяктаган. 1) 1782-ж. 30-ноябрда Улуу Британия м-н АКШ түзгөн прелиминардык, б. а. алгачкы келишим б-ча Улуу Британия АКШны суверендүү, көз каранды эмес мамлекет деп таанып, чек араларын белгилеген. 2) 1783-ж. 20-январда Улуу Британия, Франция ж-а Испания ортосунда түзүлгөн прелиминардык келишим Улуу Британияны Вест-Индиядагы Тобаго а-н ж-а Африкадагы Сенегалды Францияга, ал эми Испанияга Жер Ортолук деӊиздеги Менорка а-ын кайтарып берүүгө аргасыз кылган. Франция м-н Англия согуш убагында Индиядагы басып алышкан жерлердин бири бирине кайтарып беришкен. 3) 1783-ж. 2-сентябрда Улуу Британия м-н Нидерланддын ортосунда түзүлгөн прелиминардык тынчтык келишимине ылайык, Улуу Британия Индиядагы голл. факторияны – Негапатамды алган.