БОРДУ-ТӨР МӨӉГҮСҮ

БОРДУ-ТӨР МӨӉГҮСҮ Көөлү кырка тоосунун түндүк капталында. Көөлү суусунун оӊ куймасы Борду-Төрдүн алабында жайгашкан. Узундугу 5,6 км, аянты 5,7 км². Абляция облусунун аянты 2,2 км². Мөӊгүнүн башы деӊиз деӊгээлинен 5000 м, этеги 3660 м бийиктикте жатат. Кар чегинин бийиктиги 4200 м. Фирн облусу көп камералуу татаал цирк, андан жылып чыккан мөӊгүнүн «тили» түндүк-чыгышты карай багытталып, шынаа сымал аяктайт. Мөӊгүнүн этеги менен төмөнкү мореналардын аралыгы 700–800 м. Кийинки 50 жылда мөӊгү өзгөрүүсүз бир калыпта жатат. Мөӊгүдөн Борду-Төр суусу агып чыгып, Көөлү суусуна оӊ тараптан куят.