БОТОХАНОВА

БОТОХАНОВА Айымбүбү Өмөр кызы (10. 11. 1923, Чүй облусу, Жайыл району, Жон-Арык айылы – 19. 9. 2007, Бишкек) – алгачкы журналист, Кыргыз ССРинин маданиятына эмгек сиӊирген ишмер (1973). Фрунзедеги жумушчу жаштардын кечки мектебин (1940), республикалык партиялык мектептин котормочулар бөлүмүн (1952), КПСС БКнын алдындагы Жогорку партиялык мектептин журналистика бөлүмүн бүтүргөн (1957). «Кызыл Кыргызстан», кийин «Советтик Кыргызстан» (азыркы «Кыргыз Туусу») гезитинде адабий кызматкер, бөлүм башчы, жооптуу секретарь, редактордун орун басары (1941–44, 1948–50, 1952–54, 1957–59, 1964–74), «Кыргызстан аялдары» журналынын редактору (1958–60), Кыргызстан КП БКнын пропаганда жана агитация бөлүм башчысынын орун басары (1960–61), Кыргыз телерадиокомитетинин председатели (1961–64), «Коммунист» журналынын жооптуу секретары, редактору болгон (1974–83). Республиканын экономикасын, маданиятын көтөрүү боюнча 200дөн ашык актуалдуу, таасирдүү публицистикалык очерк, макала жана сын макалаларды басма сөзгө жарыялаган. Бир нече медаль менен сыйланган.