БАНЖУЛ

БАНЖУ́Л, Б а н д ж у л – Гамбия Республикасынын борбор шаары. Банжул округунун административдик борбору. Калкы 31,3 миӊ (2013). Банжул Гамбия дарыясы Атлантика океанына куюлган Сент-Мэри аралында жайгашкан. Сент-Мэри аралынын чыгышындагы порт. Эл аралык аэропорту бар. Деӊиз кемелерин куруучу, жеӊил, жыгаччылык, эмерек, полиграфиялык өнөр жайлары, май (пальма) заводу бар. Жер жаӊгакты иргеп, белендейт жана сыртка чыгарат. Жашылча, балык консервалоо ишканалары иштейт. 1816-жылы англичандар тарабынан Батерст (англиялык граф Батерсттин ысмынан) деген ат менен негизделип, 1973-жылдан азыркы атында аталат. Шаардын борбордук бөлүгүндө европалык, чет жакасында африкалык типтердеги курулуштар курулган. Улуттук китепкана (1985), Улуттук музей (1962), Орнитология коому (1974) иштейт.