БАРАБИНДИКТЕР

БАРАБИНДИКТЕР (өздөрүн бараба деп аташат) – Россиядагы түрк эли, Сибирь татарларынын курамындагы этностук топ. Мусулман-сунниттер. 1926-жылдагы эл каттоо боюнча саны 7528 адам болсо, кийинки каттоолордо эсептелбей калган. Учурда алардын саны 8 миңге чейин жетет (2010). Барабиндиктер волга-урал (татар-башкыр тили) жана казак-алтай тилинде сүйлөшөт. XVII кылымдын башында Барабиндиктер жашаган аймактарга орустар, кийин татарлар европалык Россиядан көчүп келип отурукташкан. XVIII кылымдын аягында татар тили, ислам дини жергиликтүү элдердин арасына кеӊири таралган. Бирок Барабиндиктердин бир бөлүгү исламга чейинки өздөрүнүн үрп-адат, салттарын, ишенимин көпкө чейин сакташкан. Барабиндиктер мал чарбачылык жана дыйканчылык менен кесиптенишкен. Тамак-ашы – негизинен эт жана ун азыктары. Суусундукка сүт жана кымыз ичишет. Барабиндиктердин маданияты Батыш Сибирь татарларына жакын.