БАТЫШ ЧОӉ ЧҮЙ КАНАЛЫ
БАТЫШ ЧОӉ ЧҮЙ КАНАЛЫ – Кыргызстандагы эӊ ири сугат тармагы. Чүй суусунан (Чыгыш Чоӊ Чүй каналынын суу алуучу курулмасынан 40 км төмөнүрөөк) башталып, Чүй өрөөнүн чыгышынан батышты карай кесип өтүп, аягы Казакстан аймагынан бүтөт. Узундугу 145 км; 82 миӊ га жерди сугарат. Суу чыгымы баш жагында 43 м2/сек, эӊ көп чыгымы 55 м3/сек. Канал 1940-жылы курула баштап, Улуу Ата Мекендик согуш мезгилинде (1943) кол менен казылган. Каналдын калган бөлүгү 1958-жылы курулуп бүткөн, 1951–54-жылдарда каналга аралыктан башкарылуучу дамба боюна 7 кичи ГЭС курулган.