БИОСИНТЕЗ

БИОСИ́НТЕЗ (био… ж-а синтез), – ферменттердин таасири менен организмде жөнөкөй органикалык заттардын пайда болуу процесси, зат алмашуунун бир бөлүгү. Бул процесс клеткаларда ферменттердин, аденозинтрифосфор, нуклеин кислоталарынын (белок синтези), биологиялык активдүү заттардын, микроэлементтердин, күн энергиясынын ж. б. катышуусу менен чөйрөнүн белгилүү бир шартында өтөт. Биосинтез организмде амин кислотасы, углевод, май ж. б. органикалык заттарды пайда кылат. Клеткада болуучу биосинтездин мүнөзү генетикалык аппаратта коддолгон (к. Генетикалык код, Транскрипция), тукум куума маалыматтар аркылуу аныкталат. Микроорганизмдерде болуучу биосинтез витаминдерди, кээ бир гормондорду, антибиотиктерди, амин кислоталарын, ошондой эле тоют белокторун алууда колдонулат.