ГВАРДИЯ

ГВА́РДИЯ – байыркы убакта мамлекет башчысын же аскер башчыны кайтарган чакан отряддар. Кийинчерээк тандалма аскер бөлүктөрү да «Гвардия» деп аталган. Гвардия аскерлердин түрү катары 1-жолу Италияда (10-кылым) пайда болгон. Орус Гвардиясын 1696–1700-жылдары Пётр I түзгөн, ал Семёновск ж-а Преображенск лейб-гвардия полкторунан турган. Кийинчерээк гвардиялык бирикмелер түзүлүп, 1918-жылы жоюлган. СССР убагында Гвардия – ардактуу наам, согушта өзгөчө эрдик көрсөткөн бөлүктөргө ж-а бирикмелерге берилген. Гвардиялык бөлүктөргө, кошуундарга, бирикмелерге өзгөчө гвардиялык туулар, кемелерге – аскер-деӊиз туулары тапшырылган. Тынч убакта аскер бөлүкчөлөрүн гвардиялык кылып кайрадан өзгөртүү жүргүзүлбөйт, к. Улуттук гвардия.