ГРОПИУС
ГРО́ПИУС Вальтер (18. 5. 1883, Берлин – 5. 7. 1969, Америка Кошмо Штаттары, Массачусетс, Бостон) – немец архитектору жана архитектура теоретиги. Мюнхен менен Берлиндеги Жогорку техникалык мектептен окуган (1903–1907). Чыгармачылыгынын өсүшүнө П. Беренстин таасири тийген. 1918-жылы Веймардагы Колдонмо жана сүрөт искусство мектебин башкарган. 1937–1952-жылдары Кембриждеги (Америка Кошмо Штаттары) Гарвард университетинин архитектура бөлүмүнүн профессору (1938-жылдан жетекчи).
Функционализмге негиз салгандардын бири. Архитектуранын рационалисттик принциптерин иштеп чыккан. Гропиус бир катар маанилүү курулуш, имараттарды долбоорлогон жана курдурган: Альфельддеги «Фагус» бут кийим фабрикасы (1911, А. Мейер менен бирге), Дессаудагы «Баухауз» имараты (1925–1926), Улуу Британиядагы Импингтон кыштак коллежи (1936–1939, М. Фрай менен бирге), Америка Кошмо Штаттарындагы Питсбургга жакын жердеги Нью-Кенсингтон өнөр жай посёлкасы (1941, М. Брёйер менен бирге), Америка Кошмо Штаттарындагы элчилигинин Афинадагы имараты (1957–1961) жана башкалар.
