БИРЮЗА

БИРЮЗА́ (персче – фирузе) – фосфаттар тобундагы минерал. Химиялык формуласы CuAl₆[РO₄]₄(OH)₈· ₄H₂O. Триклин сингониясында кристаллданат. Өӊү асман сыяктуу көгүш, көгүлтүр жашыл. Катуулугу Моос шкаласы боюнча 5–6. С. салмагы 2,6–2,8. Бирюза алюминий кычкылы менен фосфаттарга бай талаа шпаттуу тоо тектерине жер бетиндеги жез жана иондуу суулардын тийгизген таасиринен пайда болот. Чала асыл таш катары кооздук буюмдардын жасалгаларында колдонулат.