БОКС
БОКС (англ. bох — согуу, уруу) – спорттун бир түрү. 5000 жыл мурда Египет менен Вавилондо пайда болгон. Байыркы Грекияда б. з. ч. 688-жылы Олимпиялык оюндардын программасына кирген. Эл аралык ышкыбоз боксёрлор ассоциациясына (AIBA, 1946-жылы түзүлгөн) 170 өлкө мүчө. Европа (1924-жылдан) жана дүйнөлүк чемпионаттар (1974-жылдан) өткөрүлүп турат. Азыр дүйнөлүк профессионалдык Бокс боюнча уюмдар (WBA, WBC, WBO, IBF) бар. Оюн төрт тарабы аркан менен курчалган (6х6 м) аянтта (ринг) өткөрүлөт. Эки боксёр атайын жасалган жумшак тери мээлей кийип, атайын эреже боюнча бел курчоодон жогору жана бетке уруп, мушташышат. Бокс боюнча мелдештерди өткөрү спортчунун салмагына, жашына жараша бөлүштүрүлөт. Кыргызстандагы бокстун өнүгүүсүнө машыктыргычтар А. Клепцов, В. Альперин, А. Адыкулов, Ж. Кулгелдиев, Г. Аноприев ж. б-дын кошкон салымы зор. Көрүнүктүү спорт чеберлери: З. Токтогулов, К. Жекшенбеков, В. Гришковец, К. Гусев, Э. Коӊурбаев ж. б. (Кыргызстандын чемпиондору, спартакиадалардын призёрлору); А. Курнявка, О. Назаров (дүйнө чемпиондору), Н. Абдыкалыков (Европа чемпиону), Т. Кадыралиев (КМШ чемпиону).
Уффици галереясы (Флоренция).
