ВИКТОРИЯ (Улуу Британиянын королевасы)
ВИКТО́РИЯ (25.5.1819, Лондон – 22.1.1901, Уайт аралы, Осборн) – Улуу Британиянын королевасы (1837–1901), 1876-жылдан Индиянын императрицасы. Ганновер династиясынын акыркы өкүлү. Мамлекеттик иштерде королеванын ролу анчалык жогору болбогондугуна карабастан, анын башкарган жылдары «Виктория доору» аталып, анын тушунда Улуу Британия дүйнөдөгү индустриялуу алдыңкы державага ж-а Британ империясынын борборуна айланган. Викториянын атынан Британ империясынын курамына кирген бир нече шаар, дарыялар, аралдар аталган.