ВОЛЕЙБОЛ
ВОЛЕЙБО́Л (англ. vо11еу – учуп баратканда уруу ж-а bа11 – топ) – топ м-н ойнолуучу командалык спорт оюну. Тең ортосунан атайы тор м-н экиге бөлүнгөн 9 x 18 м аянтчада ойнолот.
Тордун бийиктиги эркектер үчүн – 2,43 м ж-а аялдар үчүн – 2,24 м. Топ булгаарыдан жасалып, салмагы 260–280 г, айланасы 65–67 см. Оюнга 2 тараптан 6дан (командада 12) киши катышат. Оюндун негизги шарты – топту кол м-н уруп, тордун ары жагына ашыруу. Аянтчадан сыртка түшсө, оюн жыдыйт. Оюн 5 (мурда 3) партиядан туруп, ар бир партия бир тарап эсепти 25ке (5– партияда 15ке) жеткиргиче ойнолот. Эгерде эки тарап 24:24 (5 партияда 14:14) эсебинде тең чыкса, оюн бир тараптын 2 упайлык артыкчылыгына чейин уланат. Волейбол эрежесин АКШнын Массачусетс штатындагы университетттин мугалими Вильям Морган 1895-ж. иштеп чыккан. Оюн элге 1896-ж. 1-жолу Спрингфилд шаарында көрсөтүлгөн. Ошондон баштап ал дүйнөгө, өзгөчө Европа континентине тез таркаган. Эл аралык Волейбол федерациясы (ФИВБ – FIVB) Парижде 1947-ж. уюштурулган, ал эми 1-дүйнөлүк чемпионат 1949-ж. эркектер арасында, 1952-ж. аялдар арасында өткөрүлгөн. Кыргызстанда волейбол б-ча мелдештер 20-кылымдын экинчи жарымында өткөрүлө баштаган. Республикада 1960-жылдарда волейбол сапаттуу өзгөрүүлөргө дуушар болгон. Волейболдун өсүп-өркүндөшүнө «Буревестник», «Динамо», «Спартак» ыктыярдуу спорт коомдору чоң салым кошкон. Кыргызстан ФИВБге 1992-ж. мүчө болгон.