ВОЛЬТА (Батыш Африкадагы дарыя)
ВО́ЛЬТА – Батыш Африкадагы дарыя, негизинен Гананын аймагында. Кара ж-а Ак Вольта дарыяларынын кошулушунан пайда болот. Узундугу (Кара Вольтанын башатынан) 1600 км, алабынын аянты 394 миң км2. Кара Вольта Бобо-Диуласо шаарынын (Буркина-Фасо) жанындагы дөңсөөлөрдөн башталып, Ак Вольтага кошулганга чейин кристаллдык платодогу кенен өрөөн, ортоңку бөлүгүндө Гананын Буркина-Фасо ж-а Кот-д’Ивуар өлкөлөрү м-н болгон чегаралары (бул бөлүгү босоголуу), андан ары Акосомбо шаарына чейин түздүк аркылуу агат. Бул бөлүгүндө 1964-жылы плотина курулуп, Вольта өрөөнүндө Вольта суу сактагычы пайда болгон. Чатына 110 км калганда деңиз боюндагы ойдуң аркылуу агып, Гвинея булуңуна куярда саздуу дельтаны пайда кылат. Суусунун орточо чыгымы чатында 1288 м3/сек. Ири куймасы – Оти (сол). Балык кармалат. Чатынан 400 км аралыкка чейин кеме жүрөт. Ири порттору: Япеи (Тамале-Порт; Ак Вольтада), Кете-Крачи, Акосомбо. ГЭС курулган.