БЕКТАШИЯ
БЕКТАШИЯ , б е к т а ш т а р – дербиштердин ордени ж-а бул ордендин мүчөлөрү. Эл ичинде айтылган маалыматтарга караганда, орто азиялык календер кожо Бекташ Вали Нишапури Хорасани (1208–70) тарабынан негизделген. Кичи Азияда 13-кылымдын аягы – 14-кылымдын башында алгач жергиликтүү көчмөн ж-а отурукташкан түрк элдеринде пайда болуп, кийин Түркия ж-а Балканга кеңири тараган. Бекташиянын диний ишенимдери, ырым-жырымдары ислам (негизинен шииттик) ж-а христианчылыктын айрым элементтеринен куралган. 19-кылымга чейин Түркияда Бекташиянын таасири зор болгон. Анткени бекташтар янычарлар м-н тыгыз байланышта болгон. 1826-жылы султан Махмуд II ордендин ишине тыюу салганына карабастан, 19-кылымдын ортосунда алардын иш-аракети жандана баштаган. 1925-жылы Түркия өкмөтү тарабынан өлкөдөгү бардык дербиштик ордендер жоюлган. Учурда анын борбору Албанияда орун алган.