ДВОРЖАК
ДВО́РЖАК Антонин (8. 9. 1841, Нелогозевес, Влтаве – 1. 5. 1904, Прага) – чех композитору жанга дирижёр, Прага жана Нью-Йорк консерваторияларынын профессору. Бала кезинен элдик ыр-күүлөрдү сүйгөн, алар анын чыгармачылыгынын башаты болгон.
Музыка менен өз алдынча алектенип, кийин айылдык оркестрде скрипкада ойногон. Жалпы билим берүүчү мектепти бүткөндөн кийин органда, альтта ойноону үйрөнгөн. 1857-жылы Прага орган мектебине кирет, 1859-жылы аны бүтүрүп, Прагада жаӊы ачылган Убактылуу театрдын оркестринде иштейт. 1860-жылдан бир нече симфониялык жана камералык чыгармаларды, кыл аспаптар квинтетин, квартетин, симфонияларды жана «Кипаристер» ыр циклдерин жараткан. Ал – «Альфред», «Король жана көмүрчү», «Винда», «Кежирлер», «Айлакер дыйкан», «Дмитрий», «Армида», «Суу периси» жана башка опералардын, «Славян бийлери» симфониясынын, «Ыйык Людмила» ораториясынын, фортепьяно үчүн пьесалардын жана башкалардын автору. Прагада Дворжак коому жана музейи (1932-жылдан) бар.