ДАЙЫМА ЖАШЫЛ ӨСҮМДҮКТӨР
ДАЙЫМА ЖАШЫЛ ӨСҮМДҮКТӨР – жайы-кышы жалбырагы түшпөгөн өсүмдүктөр. Эски жалбырагы бирин-сериндеп түшүп, ордуна жаӊы жалбырактар дайыма өсүп чыгып тургандыктан дайыма жашыл болуп турат. Дайыма жашыл өсүмдүктөр планетанын бардык жеринде өсөт. Көбүнчө тропик ж-а субтропик өлкөлөрүндө тараган. Дайыма жашыл өсүмдүктөргө пальмалар, фикустар, лаврлар, олеандрлар, самшит, зайтун ж. б. кирет. Мелүүн ж-а суук алкакта мырза карагайдан башка верескалар тукумундагы бадалдар, кээ бир чөптөр Дайыма жашыл өсүмдүктөр болуп эсептелет. Кышкысын мелүүн климаттуу аймактардагы өсүмдүктөрдө фотосинтез жүрбөйт, дем алуу ж. б. тиричилик процесстери жай өтөт. Жалбыракта крахмалдын ордуна кант же май пайда болуп, ал өсүмдүктүн суукка чыдамдуулугун жогорулатат. Жазында жалбырактын тиричилиги кайтадан башталат.