ЖАРЫК ДИОДУ
ЖАРЫК ДИОДУ – жарык чыгаруучу жарым өткөргүчтөн турган диод. р ж-а n тибиндеги жарым өткөргүчтөрдөн түзүлгөн система жарым өткөргүчтүү диод деп аталат. Ушул система аркылуу ток өткөндө, алар тийишкен жерде пайда болгон р–n өтүүсүнөн жарык чыгат. Ар кандай электр-техникада колдонулуучу жарым өткөргүчтүү диоддон ток өткөндө, жарык нуру чыкпайт. Ж. д-н алыш үчүн n ж-а р тибиндеги жарым өткөргүчтөргө тиешелүү кошулманын концент-сын көбөйткөндө өткөрүмдүүлүк пайда болот. Ал туннелдүү диод деп аталат. Туннелдүү диод аркылуу ток өткөндө, белгилүү бир шартта жарык нуру чыгат. Ж. д-нун спектр диапазонун кеңейтиш үчүн жарым өткөргүчкө кошулуучу аралашманын түрлөрү ж-а алардын комбинациялары колдонулат. Ж. д. радио, электрондук, электр-тех. алетте (прибордо) индикатор катары, светофордо, компьютерде, автоматтык көзөмөлдөөчү ж. б. алетте (прибордо) колдонулат.