ВАССАЛИТЕТ

ВАССАЛИТЕ́Т – орто кылымда бир феодалдын (вассалдын) керт башынын экинчи феодалга (сеньорго) көз карандылык мамилелеринин системасы. Бул система 8–9-кылымдарда Франк мамлекетинде калыптанган. Королдор жана ири феодалдар вассалдык кызмат өтөгөндөргө жер, көлүк ж б. берген. Ири феодалдар эӊ башкы сеньордун (сюзерендин) – королдун вассалына айланып, андан жер алып, майда феодалдарды өзүлөрү вассал кылышып, аларга өзүлөрү жер энчилеген. Вассалдын башкы милдети – белгилүү бир мөөнөттө (1 жылда 40 күн) аскердик кызмат аткаруу эле. Борборлошкон феодалдык мамлекеттер пайда болгон соӊ, Вассалитет бара-бара өз маанисин жогото баштаган.