БУУЛАНУУ

БУУЛАНУУ – суюк же катуу заттын бууга айлануусу. Катуу нерсенин буулануусу сублимация деп аталат. Температура жогорулаган сайын молекулалардын жылуулук кыймылы күчөп, буулануу ылдамдыгы өсөт. Температурасы туруктуу жабык идиштеги буулануу андагы суюктуктун үстүндөгү абадагы буу каныкканга чейин жүрөт. Буулануунун натыйжасында суюктук муздайт. Буулануу техникада заттарды тазалоодо же буулантып айдоо процесси менен суюктукту бөлүп алууда колдонулат. Табиятта буулануу аркылуу нымдуулук океандан жана кургактыктан атмосферага берилет, Жер шарында суунун айлануусунун негизин түзөт.